“CleanUP-6” Эх дэлхийгээ цэвэрлэх өдөрт үндэсний хэмжээнд 10,000 гаруй залуус бүртгүүллээ

Улаанбаатар хот. Байгаль орчноо хамгаалах, эх дэлхийгээ хайрлан хамгаалах зөв хандлагыг залуучуудын дунд төлөвшүүлэх зорилготой Н.Булгантамирын санаачилсан “CleanUP-6” Эх дэлхийгээ цэвэрлэх өдөр үндэсний хэмжээнд өрнөхөд бэлэн болжээ.

Тус аяны хүрээнд Монгол Улсын өнцөг булан бүрээс 10,000 гаруй залуус нэгдэж, эх дэлхийгээ цэвэрлэх үйлсэд хувь нэмрээ оруулахаар бүртгүүлээд байна.

“CleanUP-6” нь зөвхөн орчны хог хаягдлыг цэвэрлэхээс гадна иргэд, тэр дундаа залуучуудыг байгальд ээлтэй амьдралын хэв маягт уриалах, нийтийн эзэмшлийн орчинд хариуцлагатай хандах соёлыг түгээн дэлгэрүүлэхэд чиглэж буйгаараа онцлог юм.

Өдөр бүр бидний амьдралын хэв маягаас үүсэж буй хог хаягдал байгаль орчинд тодорхой хэмжээний дарамт учруулдаг. Харин нэг өдрийн цэвэрлэгээний ажлаар зогсохгүй, хүн бүр өөрийн амьдарч буй орчиндоо хариуцлагатай хандах нь урт хугацааны эерэг өөрчлөлтийн эхлэл болох юм.

Энэ удаагийн “CleanUP-6” аянд 10,000 гаруй залуус нэгдсэн нь Монголын залуучууд эх дэлхийнхээ төлөө бодит үйлдэл хийх хүсэл эрмэлзэлтэй байгааг харуулж байна. Нэг хүнээс эхэлсэн зөв дадал олон хүнд хүрч, олон хүний оролцоо нийгмийн хэмжээний өөрчлөлтийг бий болгож чадна.

Иймд “CleanUP-6” аяныг зохион байгуулагчид залуус, иргэд, аж ахуйн нэгж, байгууллагуудыг нэгдэн оролцож, “Цэвэр орчин — Эрүүл ирээдүй” гэсэн үнэт зүйлийг хамтдаа түгээн дэлгэрүүлэхийг уриалж байна.